History (ಆರ‍್ವಾ ಫಿರ್ಗಜೆಚಿ ಚರಿತ್ರಾ)

ಬಾಪ್ ಆಂಜೆಲೊ ಗವಿರಾಘಿ (1914-1927)

ಆರ‍್ವಾ ಏಕ್ ಮಿಸಾಂವ್ ಠಾಣೆಂ. ಆಂಜೆಲೊ ಗವಿರಾಘಿ ಬಾಪಾಕ್ ಹಾಂಗಾಸರ್ ಸ್ವತಂತ್ರ್ ಮಿಶನರಿ ಜಾವ್ನ್ ವಾವ್ರುಂಕ್ ವ್ಹಡಿಲಾಂಚಿ ಪರ್ವಣ್ಗಿ ಮೆಳ್‍ಲ್ಲ್ಯಾ 1914 ಜುಲಾಯ್ ಮಹಿನ್ಯಾಂತ್ ಆರ‍್ವಾ ಮಿಸಾಂವ್ ಕ್ಷೇತ್ರಾಕ್ ಖರೊ ಜನ್ಮ್ ಫಾವೊ ಜಾಲೊ ಮ್ಹಣ್ಯೆತ್. ದುಬ್ಳ್ಯಾ ಲೊಕಾನ್ ಸಾಂಗಾತಾ ಮೆಳೊನ್ ಆಸಾ ಕೆಲ್ಲ್ಯಾ ಲ್ಹಾನ್‍ಶಾ ಕೊಲ್ವಾಚ್ಯಾ ಗೊವೊಳಾಂತ್ ಆರ‍್ವಾಚೊ ಪಯ್ಲೊ ವಿಗಾರ್ ಗವಿರಾಘಿ ಬಾಪ್ ವಸ್ತಿ ಕರುಂಕ್ ಲಾಗ್ಲೊ. ಪಾಂಚ್ ವರ್ಸಾಂಚ್ಯಾ ಆವ್ದೆಕ್ ಹೊಚ್ಚ್ ಗೊವೊಳ್ ಜಾಂವ್ಕ್ ಪಾವ್ಲೊ ಇಗರ್ಜ್, ಶಿಕ್ಷಣ್ ಸಾಲ್, ವಸ್ತೆಚೆಂ ಘರ್ ಗರ್ಜೆವಂತಾಂಕ್ ಮೆಳ್ಚೊ ಜಾಗೊ ಇತ್ಯಾದಿ. ಆರಂಭಾರ್ ವೊಣದಿ ನಾತ್‍ಲ್ಲ್ಯಾ ಹ್ಯಾ ಗೊವೊಳಾಕ್ ಗವಿರಾಘಿ ಬಾಪಾನ್‍ಂಚ್ ವೊಣದಿ ಉಬಾರ‍್ಲ್ಯೊ.

ಬಾರಾ ವರ್ಸಾಂಚ್ಯಾ ಆವ್ದೆಂತ್ ಗವಿರಾಘಿ ಬಾಪಾನ್ ಆರ‍್ವಾಂತ್ ಸಬಾರ್ ಲೊಕಾಕ್ ಕ್ರಿಸ್ತಾಚಿ ವಳಕ್ ದಿಲಿ. ಸಬಾರಾಂಕ್ ಪವಿತ್ರ್ ಸ್ನಾನ್ ದಿಲೆಂ. ಆನಿ ತಾಂಚ್ಯಾ ಸರ್ವತೋಮುಖ್ ಅಭಿವೃದ್ಧಿ ತೆವ್ಶಿಂ ಗಮನ್ ದಿಲೆಂ. ಪಯ್ಲ್ಯಾ ಪಾಂಚ್ ವರ್ಸಾನಿಂ 3,500 ಲೊಕಾಕ್ ತಾಣಿಂ ಪವಿತ್ರ್ ಸ್ನಾನ್ ದಿಲೆಂ. ಭಾವಾರ್ಥ್ಯಾಂಚೊ ಸಂಖೊ ವಾಡ್ತಾನಾ ಇಗರ್ಜ್, ಮ್ಹಣ್ಜೆ ತೊ ಗೊವೊಳ್, ವಿಸ್ತರಣ್ ಕರ್ಚಿ ತಾಕಾ ಗರ್ಜ್ ದಿಸ್ಲಿ. ಹ್ಯಾ ಕಾಮಾ ಸಂಗಿಂ ಭುರ್ಗ್ಯಾಂಕ್ ಶಿಕ್ಷಣ್ ದಿಂವ್ಚಾಕ್ ಸರ್ಕಾರಾಚ್ಯಾ ಪರ್ವಣ್ಗೆನ್ ಏಕ್ ಪ್ರಾಥಮಿಕ್ ಇಸ್ಕೊಲ್‍ಯೀ ತಾಣೆಂ ಉಘಡ್ಲೆಂ.

ಗವಿರಾಘಿ ಬಾಪಾಂಚೆ ಮಿಸಾಂವ್ ಕ್ಷೇತ್ರ್ ಬದ್ಯಾರ್, ಬೆಳ್ತಂಗಡಿ ಆನಿ ಮಡಂತ್ಯಾರಾಂತ್ ವಿಸ್ತಾರ್ತಾನಾ, ಜೇಮ್ಸ್ ಡಿಸಿಲ್ವಾ ಮ್ಹಳ್ಳ್ಯಾ ವಿಶ್ವಾಸಿ ಕಾಥೆಕ್ಯೆಸ್ತಾ ಮಾರಿಫಾತ್ 1924 ಇಸ್ವೆಂತ್ ಆರ‍್ವಾಚ್ಯಾ ಇಗರ್ಜೆಚೆಂ ಕಾಮ್ ಆಖೇರ್ ಜಾಲೆಂ ಆನಿ ಧಾರ್ಮಿಕ್ ಭಯ್ಣಿಂ ಖಾತಿರ್ ಏಕ್ ಪ್ರತ್ಯೇಕ್ ಬಾಂಧಾಪ್‍ಯೀ ಉಬಾರ‍್ಲೆಂ.

ಬಾಪ್ ಲಿಯೋ ಕಾರ್ವಾಲ್ಲೊ (1927-1931)

1927 ಫೆಬ್ರವರಿಂತ್ ಗೊವ್ಳಿ ಬಾಪಾಚ್ಯಾ ಆದೇಶಾಖಾಲ್ ಆರ‍್ವಾಚೊ ವಿಗಾರ್ ಜಾವ್ನ್ ನೇಮಕ್ ಜಾಲೊ. ಕ್ರಿಸ್ತಾಚಿ ವಳಕ್ ಲೊಕಾಕ್ ದಿಂವ್ಚಾಂತ್ ತಾಣೆಂ ಉರ್ಬಾ ದಾಕಯ್ಲಿ ಆನಿ ತಶೆಂ ಸುಮಾರ್ 300 ಲೊಕಾಕ್ ಕ್ರಿಸ್ತಾಚ್ಯಾ ಹಿಂಡಾಂತ್ ಏಕ್ ಕೆಲೆಂ. ಕಾರ್ವಾಲ್ಲೊ ಬಾಪಾನ್ ಇಗರ್ಜೆಂತ್ ಗುರ್ಕಾರಾಂಚೆಂ ನೇಮಕ್ಪಣ್ ಕೆಲೆಂ ಆನಿ ಇಗರ್ಜೆಂತ್ ಏಕ್ ಗ್ರಾದ್ ಆಸಾ ಕೆಲಿ. ಮರಣ್ ಪಾವ್‍ಲ್ಲ್ಯಾಂಕ್ ನಿಕೆಪುಂಚ್ಯಾಕ್ ಇಗರ್ಜೆ ಲಾಗ್ಸಾರ್ ಏಕ್ ಸುವಾತ್ ವಿಂಚುನ್ ತಾಚ್ಯೆ ಭೊಂವ್ತಣಿ ದೊರೊ ಉಬಾರ‍್ಲೊ.

ಬಾಪ್ ಅಂತೊನಿ ನೊರೊನ್ಹಾ (1931-1934)

1931 ಮೇ 30ವೆರ್ ನೊರೊನ್ಹಾ ಬಾಪ್ ಆರ‍್ವಾಕ್ ವಿಗಾರ್ ಜಾವ್ನ್ ಆಯ್ಲೊ. ಮಟ್ವಿ ಆವ್ದಿ ತರಿಯೀ ನೊರೊನ್ಹಾ ಬಾಪಾನ್ ವರ್ತೆಂ ಮಿಸಾಂವ್ ಕಾಮ್ ಕೆಲಾಂ. ಗವಿರಾಘಿ ಬಾಪಾನ್ ಉಗಡ್‍ಲ್ಲ್ಯಾ ಇಸ್ಕೊಲಾಂತ್ ಭುರ್ಗ್ಯಾಂಚೊ ಸಂಖೊ ಅಧಿಕ್ ಉಣೊ ಆಸ್‍ಲ್ಲ್ಯಾ ನಿಮ್ತಿಂ ನೊರೊನ್ಹಾ ಬಾಪಾನ್ ತೆಂ ಬಂಧ್ ಕರಿಜಾಯ್‍ಚ್ ಪಡ್ಲೆಂ. ವಿಗಾರಾಚ್ಯಾ ವಸ್ತೆ ಘರಾಕ್ ಉದ್ಕಾಚಿ ಗರ್ಜ್ ಸಮ್ಜೊನ್ ನೊರೊನ್ಹಾ ಬಾಪಾನ್ ಏಕ್ ಬಾಂಯ್ ಆಸಾ ಕೆಲಿ.

ಬಾಪ್ ಗಸ್ಫಾರ್ ಬಾಪ್ತಿಸ್ತ್ ಪಿಂಟೊ (1934-1942)

ಆಪ್ಲಿ ಯಾಜಕೀ ತರ್ಭೆತ್ ಆಕೇರ್ ಜಾಲ್ಲಿಚ್ ಪಿಂಟೊ ಬಾಪಾಕ್ 1934 ಮೇಯಾಂತ್ ಆರ‍್ವಾಕ್ ವಿಗಾರ್ ಜಾವ್ನ್ ನೆಮ್ಲೊ. ಭಕ್ತಿವಂತ್ ಪಿಂಟೊ ಬಾಪ್ ಆಪ್ಲ್ಯಾ ಹಾತಿಂ ದಿಲ್ಲಿ ಜವಾಬ್ದಾರಿ ಪಾಳ್ತಾಸ್ತಾಂ ಭಾವಾರ್ಥ್ಯಾಂಚ್ಯಾ ಘರಾನಿಂ ಮಾಗ್ಣ್ಯಾ ಜಮಾತಿ ಆಪವ್ನ್ ತಾಂಕಾಂ ಮಾಗ್ಣ್ಯಾ ಥಂಯ್ ಅಭಿರುಚ್ ವೃದ್ಧಿ ಕರ್ಚ್ಯಾಕ್ ಆಧಾರ್ ದಿತಾಲೊ. ಹ್ಯಾ ವರ್ವಿಂ ಲೊಕಾಚೊ ಭಾವಾರ್ಥ್ ಥಿರ್ ಜಾಲ್ಲ್ಯಾಬರಿಚ್ ತಾಂಚೆಂ ಭಕ್ತಿಪಣ್ ಚಡ್ಲೆಂ. ಪಿಂಟೊ ಬಾಪಾನ್ ಇಗರ್ಜೆಚ್ಯಾ ತೋರಿಚೆಂ ದುರಸ್ತೆಚೆಂ ಕಾಮ್ ಆನಿ ಬಾಂಯ್ಚ್ಯಾ ದುರಸ್ತೆಚೆಂ ಕಾಮ್ ಹಾತಿಂ ಘೆವ್ನ್ ಪೊಂತಾಕ್ ಪಾವಯ್ಲೆಂ.

ಬಾಪ್ ಅಲ್ಫೋನ್ಸ್ ಡಿಕುನ್ಹಾ (1942-1951)

ಅರ್ಥಾಭರಿತ್ ರಿತಿನ್ ಲಿತುರ್ಜಿ ಮಾಂಡುನ್ ಹಾಡ್ಚ್ಯಾಕ್ ಡಿಕುನ್ಹಾ ಬಾಪಾನ್ ವರ್ತೆಂ ಮಹತ್ವ್ ದಿಲೆಂ. ರೆತಿರೊ, ಕುಮ್ಸಾರಾಂ, ಮಾಗ್ಣಿಂ ಹ್ಯಾ ವಿಶಿಂ ತಾಚೆಂ ಗಮನ್ ವರ್ತೆಂ. ಭುರ್ಗ್ಯಾಂಕ್ ಕ್ರಿಸ್ತಾಂವ್ ಶಿಕ್ಷಣ್ ದಿಂವ್ಚ್ಯಾ ವಿಶಿಂ ತಾಣೆಂ ಕಡ್ಡಾಯ್ ಹಾಡ್ಲಿ. ಆರ‍್ವಾಂತ್ ಸ್ತ್ರೀಯಾಂಚ್ಯಾ ಸೊಡೆಲಿಟಿಚೊ ಕಾರಣ್‍ಕರ್ತ್‍ಯೀ ತೊಚ್. 1944 ಇಸ್ವೆಂತ್ ಪೆರ್ಮುಡಾ ವಾಡ್ಯಾಚೊ ಉರುಲ್ಲೊ ವಾಂಟೊ ಆರ‍್ವಾ ಥಾವ್ನ್ ಪಯ್ಸ್ ಆಸ್‍ಲ್ಲ್ಯಾನ್ ತ್ಯಾ ಕುಶಿನ್ ಗಮನ್ ಉಣೆಂ ಆಸ್‍ಲ್ಲೆಂ. ಹ್ಯಾ ವೆಳಾ ಡಿಕುನ್ಹಾ ಬಾಪಾನ್ ಥಂಯ್ಚ್ಯಾ ಭುರ್ಗ್ಯಾಂಚ್ಯಾ ಶಿಕ್ಷಣಾಚಿ ಗರ್ಜ್ ಸಮ್ಜೊನ್ 1949 ಇಸ್ವೆಂತ್ ನಾಲ್ಕೂರಾಂತ್ ಲೊಕಾಚ್ಯಾ ಸಹಕಾರಾನ್ ಏಕ್ ಪ್ರಾಥಮಿಕ್ ಇಸ್ಕೊಲ್ ಉಘಡ್ಲೆಂ.

ಬಾಪ್ ವಿಕ್ಟರ್ ಸಲ್ಡಾನ್ಹಾ (1959-1963)

ಸಲ್ಡಾನ್ಹಾ ಬಾಪ್ ಇಜೈಚೊ ಸಹಾಯಕ್, 1959 ಮೇಯಾಚ್ಯಾ 2ವೆರ್ ಆರ‍್ವಾ ಫಿರ್ಗಜೆಚೊ ವಿಗಾರ್ ಜಾವ್ನ್ ನೇಮಕ್ ಜಾಲೊ. ಸಲ್ಡಾನ್ಹಾ ಬಾಪಾನ್ ದಾದ್ಲ್ಯಾಂಚಿ ಸೊಡೆಲಿಟಿ ಉಘಡ್ಲಿ ತಶೆಂಚ್ ಸ್ತ್ರೀಯಾಂಚಿ ಸೊಡೆಲಿಟಿ ಉಘಡ್ಲಿ. ಸ್ತ್ರೀಯಾಂಚ್ಯಾ ಸೊಡೆಲಿಟಿಕ್ ನವೊ ಜೀವ್ ಭರ‍್ಲೊ. ಆಪ್ಲ್ಯಾ ಲೊಕಾಚೆಂ ಬರೆಪಣ್ ಆಶೆಲ್ಲ್ಯಾ ಸಲ್ಡಾನ್ಹಾ ಭಾಪಾನ್ ತಾಂಚ್ಯಾ ಆತ್ಮಿಕ್ ಬರೆಪಣಾ ಸಂಗಿಂ ಲೌಕಿಕ್ ಬರೆಪಣಾ ಥಂಯ್ ಗಮನ್ ದಿಲೆಂ. ಮಲ್ನಾಡ್ ಆರ‍್ವಾಚ್ಯಾ ಲೊಕಾನ್ ಪಿಡೆಶಿಡೆನ್ ಕಷ್ಟಾನಾಶೆಂ ಸರ್ಕಾರಾಚ್ಯಾ ಕುಮ್ಕೆನ್ ಅಧಿಕ್ ಕಷ್ಟಾನಿಂ 1961 ಇಸ್ವೆಂತ್ ಆರ‍್ವಾ ಪೇಂಟೆ ಸಾಮ್ಕಾರ್ ಏಕ್ ಸರ್ಕಾರಿ ಆಸ್ಪತ್ರ್ ಉಬಾರ‍್ಚ್ಯಾಂತ್ ತೊ ಜಿಕ್ಲೊ. ಥಂಯ್ಚ್ ಲಾಗಿಂ ಆಸ್‍ಲ್ಲ್ಯಾ ಇಗರ್ಜೆಚ್ಯಾ ಖಾಲಿ ಜಾಗ್ಯಾರ್ ಸಲ್ಡಾನ್ಹಾ ಬಾಪಾನ್ ವ್ಯಾಪಾರಾಕ್ ಯೋಗ್ಯ್ ಆಸ್ಚಿಂ ಬಾಂದ್ಪಾಂ ಉಬಾರ‍್ಲಿಂ. ಬಂಜರ್ ಆಸ್‍ಲ್ಲ್ಯಾ ಇಗರ್ಜೆಚ್ಯಾ ಜಾಗ್ಯಾರ್ ಕೃಷೆಕ್ ಯೋಗ್ಯ್ ಜಾಯ್ಶೆಂ ಖೊಂಡವ್ನ್ ಗಾದೆ ಆಸಾ ಕೆಲೆ. ಪಯ್ಶಿಲ್ಯಾ ನಾಲ್ಕೂರಾಂತ್ ಆಸ್‍ಲ್ಲೆಂ ಪ್ರಾಥಮಿಕ್ ಇಸ್ಕೊಲ್ ತಾಣೆಂ ಕಥೊಲಿಕ್ ಬೊರ್ಡಾಚ್ಯಾ ತಾಬೆನ್ ದಿಲೆಂ. ಇಗರ್ಜೆ ಬಾಂದ್ಪಾಚೆಂ ಪಾಕೆಂ ಪರ್ನೆಂ ಜಾಲ್ಲ್ಯಾ ನಿಮ್ತಿಂ ಸಲ್ಡಾನ್ಹಾ ಬಾಪಾನ್ ತೆಂ ದುರಸ್ತಿ ಕರಯ್ಲೆಂ.

ಬಾಪ್ ಎಲೋಶಿಯಸ್ ಡಿಸೋಜ (1963-1964)

1963 ಮೇ 3ವೆರ್ ಇಜೈಚೊ ಸಹಾಯಕ್ ವಿಗಾರ್ ಸೋಜ್ ಬಾಪ್ ಆರ‍್ವಾಕ್ ವಿಗಾರ್ ಜಾವ್ನ್ ಪಾವ್ಲೊ. ಕೇವಲ್ ಎಕಾ ವರ್ಸಾಚಿ ಮಟ್ವಿ ಆವ್ದಿ ತರೀ ಹ್ಯಾ ವೆಳಾ ತಾಣೆಂ ಆಪ್ಲ್ಯಾ ಹಾತಾಖಾಲ್ ದಿಲ್ಲ್ಯಾ ಹಿಂಡಾಚಿ ಬರಿ ಜತನ್ ಘೆತ್ಲಿ. ಇಗರ್ಜೆಚಿ ಕೃಷಿ ಸುವಾತ್ ವಿಸ್ತರಣ್ ಕರುಂಕ್ ಮನ್ ಕೆಲ್ಲ್ಯಾ ತಾಣೆಂ ಗುಡ್ಯಾ ಸುವಾತ್ ಸಮತಟ್ಟ್ ಕರವ್ನ್ ಏಕ್ ವಿಸ್ತಾರ್ ಗಾದೊ ಆಸಾ ಕೆಲೊ. 

ಬಾಪ್ ಥೊಮಸ್ ಡಿಸೋಜ (1964-1970)

ಥೊಮಸ್ ಡಿಸೋಜ ಬಾಪ್ ಕಾಸ್ಸಿಯಾಸೊ ಸಹಾಯಕ್ ವಿಗಾರ್, 1964 ಮೇ 2ವೆರ್ ಆರ‍್ವಾಚೊ ವಿಗಾರ್ ಜಾವ್ನ್ ನೇಮಕ್ ಜಾಲೊ. ವರ್ತೆಂ ಭಕ್ತಿಪಣ್ ಆಸ್‍ಲ್ಲೊ ಹೊ ಧಾರ್ಮಿಕ್ ಕಾರ್ಯಾಂಕ್ ಮಹತ್ವ್ ದೀಂವ್ಕ್ ಲಾಗ್ಲೊ. ದಾದ್ಲ್ಯಾಂಚ್ಯಾ, ಸ್ತ್ರೀಯಾಂಚ್ಯಾ ಆನಿ ಚಲಿಯಾಂಚ್ಯಾ ಸೊಡೆಲಿಟಿಕ್ ಹಾಣೆಂ ನವೊ ಜೀವ್ ದಿಲೊ. 1966 ಇಸ್ವೆಂತ್ ಲೊಕಾಚ್ಯಾ ಸಹಕಾರಾನ್ ಏಕ್ ಘಾಂಟೆಚಿ ತೋರ್ ಉಬಾರ‍್ಲಿ. ಸರ್ತೆ ಮುಕಾಂತ್ರ್ ಇಗರ್ಜೆ ಮುಕ್ಲೊ ಜಾಗೊ ಸಮತಟ್ಟ್ ಕರವ್ನ್ ಏಕ್ ಪಾಂಯ್ ರಸ್ತೊ ಆಸಾ ಕೆಲೊ. ಥೊಮಸ್ ಬಾಪಾನ್, ನಾಲ್ಕೂರ್ ಇಸ್ಕೊಲಾಚೆಂ ಬಾಂಧಾಪ್ ವಿಸ್ತರಣ್ ಕೆಲೆಂ ಆನಿ ಧರ್ಣಿಕ್ ಸಿಮೆಟ್ ಘಾಲಯ್ಲಿ.

ಬಾಪ್ ಬೆಂಜಮಿನ್ ಡಿಸೋಜಾ (1970-1980)

1970 ಮೇ 10 ಬೆಳ್ವೆ ಫಿರ್ಗಜೆ ಥಾವ್ನ್ ಬೆಂಜಮಿನ್ ಬಾಪ್ ಆರ‍್ವಾಕ್ ವಿಗಾರ್ ಜಾವ್ನ್ ಆಯ್ಲೊ. ಕೇವಲ್ ಕ್ರೀಸ್ತಿ ಪರ್ಜೆ ಖಾತಿರ್ ನ್ಹಂಯ್ ಆಸ್ತಾಂ, ಆರ‍್ವಾಚ್ಯಾ ಸರ್ವ್ ಧರ್ಮಾಂಚ್ಯಾ ಲೊಕಾಚ್ಯಾ ಬರೆಪಣಾ ಖಾತಿರ್ ಖಳ್ಮಿತ್ ನಾಸ್ತಾಂ ವಾವ್ರ್ ದಿಲ್ಲೊ ಬೆಂಜಮಿನ್ ಬಾಪ್ ಲೊಕಾಚ್ಯಾ ಹೊಗ್ಳಿಕೆಕ್ ವರ್ತ್ಯಾ ಮಾಪಾನ್ ಪಾತ್ರ್ ಜಾಲಾ. ಲೊಕಾಚ್ಯಾ ಸರ್ವತೋಮುಖ್ ಅಭಿವೃದ್ಧೆಕ್ ವಾವ್ರ್ ಕೆಲ್ಲ್ಯಾ ಆನಿ ಯೋಜನ್ ಮಾಂಡುನ್ ಕಾರ್ಯಗತ್ ಕೆಲ್ಲ್ಯಾ ತಾಚೇ ವರ್ವಿಂ ಆಜ್ ಆರ‍್ವಾ ಸಬಾರಾಂಕ್ ಕಳಿತ್ ಆಸ್‍ಲ್ಲೊ ಗಾಂವ್ ಜಾಂವ್ಕ್ ಪಾವ್ಲಾ. ದೂದಾ ಸೊಸೈಟಿ, ಜೈ ಕಿಸಾನ್ ಯುವಕ್ ಸಂಘ್, ಜ್ಞಾನ ಮಾರ್ಗ, ಶಿಕ್ಪಾ ಸಭಾ ಸಾಲ್, ವ್ಯವಸಾಯ ಸಹಕಾರಿ ಸಂಘ್-ರೇಶನ್ ವಿತರಣ್ ಕರುಂಕ್ ಆಂಗಡ್, ಮಹಿಳಾ ಮಂಡಲ್, ಇತ್ಯಾದಿ ಕಾಮಾಂ ಬೆಂಜಮಿನ್ ಬಾಪಾ ವರ್ವಿಂ ಆನಿ ಲೊಕಾಚ್ಯಾ ಸಹಕಾರಾನ್ ಉಜ್ವಾಡ್ ದೆಖುಂಕ್ ಪಾವ್ಲಿಂ. ತುಳು ಕ್ರಿಸ್ತಾಂವಾಂಕ್ ಆನಿ ದುರ್ಬಳ್ಯಾಂಕ್ ವಸ್ತೆಕ್ ಘರಾಂ, ಸಬಾರಾಂಕ್ ಭುಂಯ್, ದರ್ಖಾಸ್, ವಿಶೇಷ್ ದುಡ್ವಾ ಸಹಾಯ್ ಇತ್ಯಾದಿ ದಿಂವ್ಚಾಂತ್ ಬೆಂಜಮಿನ್ ಬಾಪಾಚೆಂ ಪರಿಶ್ರಮ್ ಪ್ರಶಂಸನೀಯ್‍ಚ್ ಸಯ್. ಬೆಂಜಮಿನ್ ಸೋಜ್ ಬಾಪಾನ್ ಇಗರ್ಜೆಚ್ಯಾ ಮುಖ್ಲ್ಯಾ ಕುಶಿಕ್ ಚಿರ‍್ಯಾ ಫಾತ್ರಾಂಚೊ ದೊರೊ ಉಬಾರಾವ್ನ್ ಗೇಟ್ ಆಸಾ ಕೆಲಿ. ಸಿಮಿಸ್ತ್ರೇ ಸಾಮ್ಕಾರ್ ಏಕ್ ತಳೆಂ ಖೊಂಡವ್ನ್ ಇಗರ್ಜೆಚ್ಯಾ ಸರ್ವ್ ಸುವಾತ್ಯಾಂಕ್ ಉದಾಕ್ ಮೆಳಾಶೆಂ ಕೆಲೆಂ ಆನಿ ಬಂಜರ್ ಜಾಗ್ಯಾರ್ ಮಾಡಾ ಕವಾತ್ಯೊ ಲಾಯ್ಲ್ಯೊ. ಆರ‍್ವಾ ಇಗರ್ಜೆಚೊ ಪನ್ನಾಸ್(50) ವರ್ಸಾಂಚೊ ಜುಬ್ಲೆವ್ ಬೆಂಜಮಿನ್ ಬಾಪಾಚ್ಯಾ ಕಾಳಾರ್ ಸಂಭ್ರಮಾನ್ ಜಾಲೊ.

ಲ್ಹಾನಾಂಕ್ ತಶೆಂ ವ್ಹಡಾಂಕ್ ಶಿಕ್ಪಾ ಜಮಾತಿ ಆಸಾ ಕರ್ಚ್ಯೊ, ಹೆಳ್‍ಲ್ಲ್ಯಾ ಮನ್ಶಾಂ ಮುಕಾಂತ್ರ್ ಶಿಕ್ಷಣ್ ದಿವಂವ್ಚೆಂ, ಸರ್ಕಾರಿ ಕಾನೂನಾವಿಶಿಂ ಲೊಕಾಕ್ ಮಾಹೆತ್ ದಿಂವ್ಚಿ, ಮನೋರಂಜನಾಕ್ ಕಾರ್ಯಕ್ರಮಾಂ ಮಾಂಡುನ್ ಹಾಡ್ಚಿಂ, ಭಲಾಯ್ಕೆ ವಿಶಿಂ ಶಿಕವ್ಣ್, ಅಮಾಲ್ ಪಿಯೊವ್ಣ್ಯಾಕ್ ಪಾಟ್ ಕರುಂಕ್ ಉತ್ತೇಜನ್, ಅಭಿವೃದ್ಧೆಚ್ಯಾ ಕಾಮಾಂಕ್ ಸಹಾಯ್ ದಿಂವ್ಚಿ, ಶಿಕ್ಷಣಾಕ್ ಮಹತ್ವ್, ಹ್ಯಾ ಸರ್ವ್ ವಿಷಯಾನಿಂ ಬೆಂಜಮಿನ್ ಬಾಪಾನ್ ಆರ‍್ವಾ ಇಗರ್ಜೆಂತ್ ಜಾಯ್ತೆಂ ಕಾಮ್ ಕೆಲಾಂ. ಬೆಂಜಮಿನ್ ಬಾಪಾಚ್ಯಾ ವೆಳಾರ್ ಆರ‍್ವಾಂತ್ ಆವಯ್ ಭುರ್ಗ್ಯಾಂಚೆಂ ಕಾರ್ಯಕ್ರಮ್ ಆರಂಭ್ ಜಾಲೆಂ. ಸಿ.ಒ.ಡಿ.ಪಿ. ಸಂಸ್ಥ್ಯಾಚ್ಯಾ ಕುಮ್ಕೆನ್ ಸಬಾರ್ ಅಭಿವೃದ್ಧೆಚಿಂ ಕಾಮಾಂ ಕೆಲಿಂ‌ (ರಸ್ತೆ, ಮಯ್ದಾನಾಂ, ಘರಾಂ ಇತ್ಯಾದಿ). ಸಬಾರ್ ದುಬ್ಳ್ಯಾ ಭುರ್ಗ್ಯಾಂಕ್ ಶಿಕ್ಷಣಾಕ್ ಸಹಾಯ್ ಮೆಳಾಶಿ ಕೆಲಿ.

ಹ್ಯಾಚ್ ವಿಗಾರಾನ್ ಇಗರ್ಜೆಕ್ ವೀಜ್ ಸಕ್ತೆಚಿ ಸೌಲತಾಯ್ ಆಸಾ ಕೆಲಿ. ಇಗರ್ಜೆಂತ್ ಜಾಗೊ ಉಣೊ ಆಸ್‍ಲ್ಲ್ಯಾನ್ ಗ್ರಾದ್ ಆನಿ ಹೆರ್ ಇಮಾಜಿ ಕಾಡಯ್ಲ್ಯೊ.

ಬಾಪ್ ಮಥಾಯಸ್ ಪಿರೇರಾ (1980-1985)

ಮೇ ಮಹಿನ್ಯಾಚ್ಯೆ 10 ತಾರಿಕೆರ್ ಆರ‍್ವಾಚೊ ವಿಗಾರ್ ಜಾವ್ನ್ ಆಯ್ಲೆಲ್ಯಾ ಮಥಾಯಸ್ ಬಾಪಾನ್ ಆತ್ಮಿಕ್ ಸಂಗ್ತಿಂಕ್ ಚಡ್ ಗುಮನ್ ದಿಲೆಂ. ಭುರ್ಗ್ಯಾಂಕ್ ಗಿತಾಂ, ದೊತೊರ್ನ್ ಶಿಕೊವ್ನ್, ವ್ಹಡಾಂಕ್ ಲಿತುರ್ಜಿಂತ್ ಜಿವಾಳ್ ಕರುನ್ ರೆತಿರ‍್ಯೊ, ಶೆಜಾರ‍್ಯಾಂಚ್ಯೊ ಮಗ್ಣ್ಯಾ ಜಮಾತಿ ಆಸಾ ಕರುನ್ ಲೊಕಾಕ್ ಉರ್ಬೆನ್ ಭರ‍್ಲಿಂ, ಪಿಡೆಸ್ತಾಂಚಿ ಭೆಟ್ ಆನಿ ದಲಿತ್ ಕ್ರೀಸ್ತಿ ಲೊಕಾಚಿ ಭೆಟ್ ತಾಕಾ ಚಡ್ ಮೊಗಾಚೆಂ ಮಿಸಾಂವ್. ದಲಿತಾಂಕ್ ತಾಣೆಂ ಘರಾಂಯ್ ಬಾಂದಯ್ಲಿಂ.

ಬಾಪ್ ವಲೇರಿಯನ್ ಸೋಜ್ (1985-1993)

1985 ಜೂನ್ 23ವೆರ್ ಕಯ್ಯಾರ್ ಫಿರ್ಗಜೆ ಥಾವ್ನ್ ಆರ‍್ವಾಕ್ ಆಯ್ಲಲ್ಯಾ ತಾಣೆಂ ಆಪ್ಲ್ಯಾ ಜಿವಿತಾಚ್ಯಾ ಸಾದೆಪಣಾನ್ ಜಾಯ್ತೆಂ ಬರೆಪಣ್ ಕೆಲೆಂ. ವರ್ಸಾಕ್ ಏಕ್ ಪಾವ್ಟಿಂ ರೆತಿರ್, ತುಳು ಕ್ರಿಸ್ತಂವಾಂಕ್ ತುಳು ಭಾಶೆನ್ ರೆತಿರ್, ಪೀಟರ್ ಕ್ಲೇವರ್‌ ಯುವ ಸಂಫ್, ನಾಲ್ಕೂರಾಂತ್ ಆಯ್ತಾರಾಚೆಂ ಮೀಸ್ ಹ್ಯಾ ಸಕ್ಡಾಕ್ ಸುರ್ವಾತ್ ದಿಲಿ. ಚಾಲ್ತೆಂ ಇಗರ್ಜೆ ಬಾಂದಪ್ ಪರ್ನೆಂ ಆನಿ ಲ್ಹಾನ್ ದೆಕುನ್ 1990 ಮೇಯಾಂತ್ ನವೆಂ ಬಾಂದಪ್ ಸುರು ಕರುನ್ 1992 ಫೆಬ್ರೆರ್ 27 ವೆರ್ ತಾಚೆಂ ಉಗ್ತವಣ್ ಜಾಲೆಂ. ಫಿರ್ಗಜ್ ಸ್ಥಾಪನಾಚ್ಯಾ ಅಮೃತೋತ್ಸವಾಚೊ ದಬಾಜೊ ತಶೆಂಚ್ ನಾಲ್ಕೂರ್ ಇಸ್ಕೊಲಾಚೊ ಭಾಂಗ್ರಾಳೊ ದಬಾಜೊ ಚಲೊಂವ್ಕ್ ತಾಣೆಂ ಮುಖೆಲ್‌ಪಣ್ ಫೆತ್ಲೆಂ. ಫಕತ್ ಇಗರ್ಜ್ ಬಾಂದ್ಲಲಿ ನ್ಹಂಯ್ ಆಸ್ತಾಂ ಫಿರ್ಗಜ್ ಕುಟಮ್ ಬಾಂದುನ್ ಹಾಡ್ಲಲೆಂ ತಾಚೆಂ ಕಾಮ್ ಖರ‍್ಯಾನ್‌0ಚ್ ವರ್ತೆಂ.

ಬಾಪ್ ಜೋಸೆಫ್ ಲೋಬ್ (1993-2000)

ಮೇ ಮಹಿನ್ಯಾಚ್ಯೆ 22 ತಾರಿಕೆರ್ ಆರ‍್ವಾಚೊ ವಿಗಾರ್ ಜಾವ್ನ್ ಜವಾಬ್ದಾರಿ ಫೆತ್ಲಿ. ಕೃಷಿ ವಿಶಿಂ ಗುಮನ್ ದಿಲ್ಲ್ಯಾ ತಾಣೆಂ ತಳೆಂ ದುರಸ್ತಿ ಕೆಲೆಂ ಅನಿ ಗಾದ್ಯಾಂನಿ ನವ್ಯಾನ್ ಬೆಳೆಂ ಕರುಂಕ್ ಸುರ್ವಾತ್ ಕೆಲಿ. ಸುಮಾರ್ 6 ಎಕ್ರೆ ಸುವಾತೆರ್ ರಬ್ಬರ್ ಕೃಷಿ ಸುರು ಕೆಲಿ. ನವ್ಯಾ ಇಗರ್ಜೆ ಬಾಂದ್ಪಾ ಬಗ್ಲೆನ್‌ಚ್ ನವೆಂ ಯಾಜಕಾಚೆಂ ವಸ್ತೆ ಘರ್ ಆಸಾ ಕೆಲೆಂ. ಆರ್ವಾಚ್ಯೆ ಪೆಂಟೆಂತ್ ಆಸ್ಲಲ್ಯಾ ಇಗರ್ಜೆಚ್ಯಾ ಜಾಗ್ಯಾರ್ 1998 ವರ್ಸಾ ಆಧುನಿಕ್ 'ಚರ್ಚ್ ಕಾಂಪ್ಲೆಕ್ಸ್' ಉಬಾರ‍್ಲೆಂ ಆನಿ ಜಾಯ್ತ್ಯಾ ಜಣಾಂಕ್ ವ್ಯಾಪಾರಾಂತ್ ರಿಗುಂಕ್ ಆವ್ಕಾಸ್ ದಿಲೊ. 

ಬಾಪ್ ಪಾಸ್ಕಲ್ ಮಿನೆಜ್ (2000-2001)

ಮೇಯಾಚ್ಯೆ 23 ತಾರಿಕೆರ್ ಆರ‍್ವಾಕ್ ಪಾವ್ಲಲ್ಯಾ ಬಾಪ್ ಪಾಸ್ಕಲಾನ್ ಫಕತ್ ಎಕಾ ವರ್ಸಾಚ್ಯೆ ಆಪ್ಲೆ ಸೆವೆಚ್ಯೆ ಆವ್ದೆಂತ್ ಭುರ್ಗ್ಯಾಂಚ್ಯಾ ಆನಿ ಯುವಜಣಾಂಚ್ಯೆ ತರ್ಬೆತಿ ಥಂಯ್ ವಿಶೇಸ್ ವಾವ್ರ್ ಕೆಲೊ. ಕೃಷಿಂತ್ ಉಮೆದ್ ದಾಕಯ್ಲೆಲ್ಯಾ ತಾಣೆಂ 400 ಮಾಡಿಯೊ ಲಾಯ್ಲ್ಯೊ. ಆನಿ ಹೆರ್ ಲಿತುರ್ಜಿಕ್ ವಾವ್ರಾಕ್ ವೇಳ್ ದಿಲೊ. 

ಬಾಪ್ ಬೆಂಜಮಿನ್ ಪೀಂತ್ (2001-2008)

ಮೇ 18 ವೆರ್ ಪಾಲಡ್ಕ ಥಾವ್ನ್ ಆರ‍್ವಾಕ್ ಪಾವ್‍ಲ್ಲ್ಯಾ, ಸಾದೆಪಣಾನ್ ಭರ‍್ಲೆಲ್ಯಾ ತಾಣೆಂ ಧಾರ್ಮಿಕ್ ಶಿಕೊವ್ಣ್, ಮಾಗ್ಣೆಂ ರೆತಿರ್, ಶಿಕ್ಪಾ ಶಿಬಿರಾಂ ಉದೆಶಿಂ ಗುಮನ್ ದಿಲೆಂ. ಲ್ದಾನ್ ವ್ಹಡ್, ಗ್ರೇಸ್ತ್ ದುಬ್ಳಿಂ, ಶಿಕ್ಪಿ ಅಶಿಕ್ಪಿ ಸಕ್ಡಾಂಕ್ ಏಕ್ ಸಾರ್ಕೆಂ ಪಳೆಲ್ಲ್ಯಾ ತಾಣೆಂ ಸಂಘಟನಾಂಕ್ ನವೊ ಜೀವ್ ಭರ‍್ಲೊ. ನವಿ ಬೋರ್ ವೆಲ್ಲ್ ಆಸಾ ಕರುನ್ ಸುಮಾರ್ 800 ಮಾಡಿಯೊ ಆನಿ 1200 ರಬ್ಬರ್ ಝಡಾಂ ಲಾಯ್ಲಿಂ ಆನಿ ಕೃಷಿ ಬರಿ ಕೆಲಿ. 2004 ವರ್ಸಾ ತಾಣೆಂ ಆರ‍್ವಾಂತ್ ಇಂಗ್ಲಿಷ್ ಶಿಕ್ಪಾ ಖಾತಿರ್ ಸುರು ಕೆಲ್ಲ್ಯಾ ಇಸ್ಕೊಲಾಂತ್ ಆತಾಂ ಹೈಸ್ಕೂಲ್ ಪರ್ಯಾಂತ್ ಕ್ಲಾಶಿ ಚಲ್ತಾತ್.

ಬಾಪ್ ಅರುಣ್ ಲೋಬೊ (2008-2011)

ಬಂಟ್ವಾಳ್ ಮೊಡಂಕಾಪ್ ಫಿರ್ಗಜೆಂತ್ಲೊ ಸಹಾಯಕ್ ಬಾಪ್ ಅರುಣ್ ಮೇಯಾಚ್ಯೆ 4 ತಾರಿಕೆರ್ ಆರ‍್ವಾಚೊ ವಿಗಾರ್ ಜಾಲೊ. ಯುವಜಣಾಂಕ್ ಆನಿ ಭುರ್ಗ್ಯಾಂಕ್ ತೊ ಚಡ್ ಮೊಗಾಚೊ ಜಾಲೊ. ಭುರ್ಗ್ಯಾಂಚ್ಯಾ ಶಿಕ್ಪಾಕ್ ಆನಿ ಹೆರ್ ಚಟುವಟಿಕಾಂಕ್ ಗುಮನ್ ದಿಲ್ಲ್ಯಾ ತಾಣೆಂ ಇಸ್ಕೊಲಾ ತೆವ್ಶಿಂ ವೇಳ್ ದಿಲೊ. ಗರ್ಜೆ ಪುರ್ತಿಂ ಭುರ್ಗಿಂ ನಾಂತ್ ದೆಕುನ್ ನಾಲ್ಕೂರ್ ಇನ್‌ಫೆಂಟ್ ಮೇರಿ ಇಸ್ಕೊಲ್ ಬಂದ್ ಕೆಲೆಂ.

ಬಾಪ್ ಆಬೆಲ್ ಲೋಬ್ (2011-2018)

ವಾಮದಪದವು ಥಾವ್ನ್ ಮೇಯಾಚ್ಯೆ 10 ತಾರಿಕೆರ್ ಆರ‍್ವಾಕ್ ಪಾವ್ಲಲ್ಯಾ ಆಬೆಲ್ ಬಾಪಾನ್ ಪಯ್ಲ್ಯಾ ವರ್ಸಾಚ್ ಇಸ್ಕೊಲಾಚ್ಯಾ ಪಯ್ಲ್ಯೆ ಮಾಳಿಯೆಚೆಂ ಕಾಮ್ ಸುರು ಕೆಲ್ಲೆಂ, 75 ಲಾಖ್ ಖರ್ಚಾನ್ ಪುರ್ತೆಂ ಕೆಲೆಂ. ಬರೊ ಗಾವ್ಪಿ ಜಾಲ್ಲ್ಯಾ ತಾಣೆಂ ಗಾಯನಾಂ, ಲಿತುರ್ಜಿ, ಕೃಷಿ, ಶಿಬಿರಾಂ ತೆವ್ಶಿಂ ಜಾಯ್ತೊ ವಾವ್ರ್ ಕೆಲ್ಲೊ ಆಸಾ. ಇಗರ್ಜೆ ಹಿತ್ಲಾಂತ್ ಚಡ್ತಿಕ್ 300 ಮಾಡಿ ಲಾಯ್ಲ್ಯಾ. ನಾಲ್ಕೂರ್ ಇಸ್ಕೊಲಾಚ್ಯಾ ಜಾಗ್ಯಾಕ್ ಸೆಜಾರಿ ಅಕ್ರಿಸ್ತಾಂವ್ ಬಾಂವ್ಡಾಂ ಥಾವ್ನ್ ಜಾಗ್ಯಾಚೆ ತಕ್ರಾ‌ರ್ ಅಸ್ಲಿ ದೆಕುನ್ ತೊ ಮೆಜವ್ನ್, ವೋಯ್ ಘಾಲವ್ನ್, ಮಾರ್ಗಾಚಿ ವ್ಯವಸ್ಥಾ ಕರ್ನ್ ದಿಲ್ಯಾ. ಫಿರ್ಗಜೆಚ್ಯಾ ಶೆಂಬರ್ ವರ್ಸಾಂಚ್ಯಾ ಜುಬ್ಲೆವಾ ಉದೆಶಿಂ ವೆವೆಗ್ಳಿಂ ಕಾರ್ಯಕ್ರಮಾಂ ಮಾಂಡುನ್ ಹಾಡುನ್ ಲೊಕಾಕ್ ಸರ್ವ್ ರಿತಿನ್ ಕಾರ್ಯಾಳ್ ಕರುನ್ ಫಿರ್ಗಜ್ ಜಿವಾಳ್ ಕೆಲಿ. ಇಗರ್ಜೆಕ್ ನವೆಂ ರೂಪ್ ದಿಂವ್ಚ್ಯಾ ಇರಾದ್ಯಾನ್ ಮುಕ್ಲಿ ತೊರಿಕ್, ಸಾಂಕ್ತುವರಿಕ್ ಆನಿ ಕೊಪೆಲ್ಮಾರಾಚ್ಯೆ ಪಾಟ್ಲೆ ವಣ್ತಿಕ್ ಸುಮಾರ್ 25 ಲಾಖ್ ಖರ್ಚಾರ್ ನವೊ ವಿನ್ಯಾಸ್ ದೀವ್ನ್ ಚಡ್ತಿಕ್ ಸೊಭ್ ದಿಲಿ.

ಇಗರ್ಜೆಚ್ಯಾ ನವೀಕರಣ್ ಖಾತಿರ್ 35 ಲಾಖ್ ಅನುದಾನ್ ಹಾಡವ್ನ್ ಇಗರ್ಜೆಚ್ಯಾ ದರ್ಣಿಕ್ ಗ್ರಾನೈಟ್ ಆನಿ ಇಗರ್ಜೆಕ್ ದಾನಿ ಮುಕಾಂತ್ರ್ ನವ್ಯಾ ಬಾಂಕಾಂಚಿ ವ್ಯವಸ್ಥಾ ಕೆಲ್ಯಾ. ಇಸ್ಕೊಲಾ ಖಾತಿರ್ ದುಸ್ರ್ಯಾ ಮಾಳಿಯೆಚೆಂ ಕಾಮ್ ಸಂಪವ್ನ್ ಇಸ್ಕೊಲಾಚಿ ಅಭಿವೃದ್ಧಿ ಕೆಲಿ. ಆರ‍್ವಾ ಫಿರ್ಗಜೆಕ್ ಸಾತ್ ವರ್ಸಾನಿಂ ನವೆಂ ರೂಪ್ ದೀವ್ನ್ 2018 ಇಸ್ವೆಚ್ಯಾ 5 ವೆರ್ ಉಪ್ಪಿನಂಗಡಿ ಫಿರ್ಗಜೆಕ್ ವರ್ಗ್ ಜಾವ್ನ್ ಗೆಲೆ.

ಬಾಪ್ ನವೀನ್ ಪಿಂಟೊ (2018-2021)

ನವೀನ್ ಪಿಂಟೊ ಬಾಪ್ 2018 ಇಸ್ವೆಚ್ಯಾ ಜೂನ್ 4 ತಾರೀಕೆರ್ ಆರ‍್ವಾಚೊ ವಿಗಾರ್ ಜಾವ್ನ್ ನೇಮಕ್ ಜಾಲೊ. ಕೃಷೆಂತ್ ವಿಶೇಸ್ ಆಸಕ್ತ್ ದಾಕಯಿಲ್ಲ್ಯಾ ಬಾಪಾನಿಂ 1400 ಮಾಡಿಯೊ ಸಸ್ಯೊ ಲಾವ್ನ್ ಬರೊ ಪೋಸ್ ಕೆಲೊ. ನಾಲ್ಕೂರ್ ಕೊಪೆಲಾಚೊ ಜಾಗೊ ಇಗರ್ಜೆಚ್ಯಾ ನಾಂವಾರ್ ಕರುಂಕ್ ಜಾಯ್ತಿ ಮ್ಹಿನತ್ ಕಾಡ್ನ್ ಯಶಸ್ವಿ ಜಾಲೊ. ಸಾಂಗಾತಾ ಕೊಪೆಲಾಚೆಂ ನವೀಕರಣ್ ಕರುನ್ ನವೊ ದಾರ್ವಟೊ, ಪೊರ್ಟಿಕೊ, ಹೈ ಮಾಸ್ಟ್ ಲೈಟ್, ಕೊಪೆಲಾಚೆಂ ಪಾಕೆಂ ರಿಪೇರಿ ಸಗ್ಳೆಂ ಕರ್ನ್ ಕೊಪೆಲಾಚಿ ಅಭಿವೃದ್ಧಿ ಕೆಲಿ. ಇಗರ್ಜೆಚ್ಯಾ ಸಿಮೆಸ್ತ್ರಿಕ್ ಸರ್ಕಾರಾ ಥಾವ್ನ್ ಅನುದಾನಾಂ ಖಾತಿರ್ ದಸ್ತವೆಜಾಂ ಸರ್ಕಾರಾ ಥಾವ್ನ್ ಹಾಡುನ್ ಅನುದಾನ್ ಮೆಳಾಶೆಂ ಕೆಲೆಂ. ಸುಸಜ್ಜಿತ್ ಇಗರ್ಜೆಚೊ ದಫ್ತರೊ, ಮಿನಿ ಹೊಲಾಚಿ ವ್ಯವಸ್ಥಾ, ಸಿಮೆಸ್ತ್ರಿಕ್ ಮೆಟಾಂ, ಇಸ್ಕೊಲಾಕ್ ದೊರೊ, ದುಬ್ಳ್ಯಾ ಕುಟ್ಮಾಕ್ ಘರಾಂ, ರಬ್ಬರ್ ಕಾಮೆಲ್ಯಾಂಕ್ ರಾಂವ್ಚಿ ವ್ಯವಸ್ಥಾ, ಇಸ್ಕೊಲಾಚ್ಯಾ ಮೈದಾನಾರ್ ಪಾತ್ರೊನಾಚ್ಯಾ ಮಾನಾಕ್ ಗ್ರೊಟ್ಟೊ, ಸುಸಜ್ಜಿತ್ ಇಗರ್ಜೆಚೆಂ ದಫ್ತಾರ್, ಇಗರ್ಜೆಕ್ ವ್ಹಡ್ಲ್ಯಾ ಫ್ಯಾನಾಂಚಿ ವ್ಯವಸ್ಥಾ ಆನಿ ಇಗರ್ಜೆಕ್ ತ್ರಿ ಫೇಸ್ ಕನೆಕ್ಷನ್ ಅಸಲಿಂ ಸಬಾರ್ ಅಭಿವೃದ್ಧೆ ಕಾಮಾಂ ತಾಣಿಂ ಮಟ್ವ್ಯಾ ಆವ್ದೆಂತ್ ಪಂತಾಕ್ ಪಾವಯ್ಲಿಂ. ಇಸ್ಕೊಲಾ ಖಾತಿರ್ ದೋನ್ ನವಿಂ ಬಸ್ಸಾಂ ಆನಿ ತಾಕಾ ಪಾರ್ಕಿಂಗ್ ವ್ಯವಸ್ಥಾಯ್ ತಾಂಣಿಂ ಕರಯ್ಲಿ. ತೀನ್ ವರ್ಸಾಂ ಸೆವಾ ದೀವ್ನ್ 2021 ಜುಲಾಯ್ ಮಹಿನ್ಯಾಂತ್ ಜೆಪ್ಪು ಸೆಮಿನರಿಚೆ ಪ್ರೊಫೆಸರ್ ಜಾವ್ನ್ ತಾಂಕಾಂ ಆರ‍್ವಾ ಥಾವ್ನ್ ವರ್ಗ್ ಜಾಲೊ.

ಬಾಪ್ ಎಲಾಯಸ್ ಡಿಸೋಜ (2021- )

2021 ಇಸ್ವೆಚ್ಯಾ ಜುಲೈ 15 ತಾರೀಕೆರ್ ಬಾಪ್ ಎಲಾಯಸ್ ಸೋಜಾನಿಂ ಆರ‍್ವಾ ಫಿರ್ಗಜೆಚೊ ಅಧಿಕಾರ್ ಸ್ವೀಕಾರ್ ಕೆಲೊ. ಫಿರ್ಗಜೆಚ್ಯಾ ಸರ್ವತೋಮುಖ್ ಅಭಿವೃದ್ಧೆ ಥಂಯ್ ಆಸಕ್ತ್ ದಾಖಯಿಲ್ಲ್ಯಾ ತಾಂಣಿಂ ಸಬಾರ್ ಕಾಮಾಂ ಸಂಪಯ್ಲ್ಯಾಂತ್ ಆನಿ ವಾವ್ರ್ ಮುಂದರುನ್ ಆಸಾ. ಸರ್ಕಾರಾಚ್ಯಾ ಅನುದಾನಾ ಮಾರಿಫಾತ್ ಸಿಮೆಸ್ತ್ರಿಕ್ ನವೊ ದೊರೊ, ಇಂಟರ್ ಲಾಕ್, ದ್ವಾರ್ ಘಾಲ್ನ್ ಆಕರ್ಶಿತ್ ರಿತಿನ್ ಸೊಭಾಯ್ಲ್ಯಾ. ಇಗರ್ಜೆಚೊ ಮುಕ್ಲೊ ರಸ್ತೊ ಕಾಂಕ್ರೀಟಿಕರಣ್, ಮಿನಿ ಹಾಲಾ ಖಾತಿರ್ ನವಿಂ ಟೊಯ್ಲೆಟಾಂ, ಪರ್ನೆಂ ಟೊಯ್ಲೆಟ್ ನವೀಕರಣ್, ಮಿನಿ ಹೊಲಾಕ್ ರ‍್ಯಾಂಪ್, ಕೋಯೆರಾ ಖಾತಿರ್ ವಿಂಗ್, ದುಬ್ಳ್ಯಾ ಖಾತಿರ್ ಘರಾಂ, ನಾಲ್ಕೂರ್ ಕೊಪೆಲಾಚೆಂ ಪಾಕೆಂ ರಿಪೇರಿ, ವಿಗಾರಾಚೆಂ‌ ವಸ್ತೆ ಘರ್ ನವೀಕರಣ್, ಅಶೆಂ ಸಬಾರ್ ಕಾಮಾಂ ಜಾವ್ನ್ ಆರ‍್ವಾ ಫಿರ್ಗಜ್ ಸುಸಜ್ಜಿತ್ ಜಾಲ್ಯಾ. ಸಗ್ಳ್ಯಾ ವರ್ಸಾಚೆಂ ಕ್ರೀಯಾ ಯೋಜನ್ ಪಯ್ಲೆಂಚ್ ಕರ್ನ್, ಫಿರ್ಗಜೆಂತ್ ವಿವಿಧ್ ಕಾರ್ಯಕ್ರಮಾಂಕ್ ದಿಶಾ ಲಾಬ್ಲ್ಯಾ.